外送員抽成.停權爭議 學者建議立專法保權益
郭柏均 謝季潾 / 臺北報導
發布時間：
更新時間：
根據勞動部的資料，全臺大約有13萬外个外送員當咧替大眾服務。毋過外送平台一直傳出扣外送員的獎金、用無合理的理由共外送員停權的消息。有學者建議會使參考外國的經驗，若是符合平台利用通訊裝置咧控制外送員等等條件，就直接認定是頭家佮辛勞關係，進一步保障外送員的權益。(本篇新聞標題、導言、內文皆為臺文)
外送平台的外送員四界攏看會著，但是in的權益敢有受著保障？全國外送產業工會指出，雖然勞動部有訂定《外送員勞動權益指導原則》，但是這並無強制性。
全國外送產業工會理事長 陳昱安：「譬如講指引有訂講平台愛共外送員投保第三人責任險，佇舊年十一月初一正式通過。到今年四月，平台猶是無共外送員投保。」
若欲完整保障，猶是愛立專法。有學者指出，專法除了欲解決上低報酬的問題，上重要的就是外送員佮外送平台之間，到底是雇傭關係、抑是承攬關係。
陽明交通大學科技法律學院副教授 邱羽凡：「無你敢欲叫所有的外送員攏去行訴訟？確實這馬就是有外送員咧訴訟，就是佇法令無清楚的狀況之下，欲解決勞工身份錯誤分類的問題。你明明是勞工，煞予人分類做承攬，這敢毋是立法欲解決的問題？歐盟、西班牙的騎士法，若外送平台用通訊裝置控制外送員，立法直接推定你是勞工。」
聽著外送員就是勞工的見解，在場參與的濟濟民眾佮外送員攏拍噗仔。毋過也有學者認為，除了承攬佮雇傭關係，專法嘛會使開發出第三種可能。
臺灣海大海洋法律與政策學院副教授 江雅綺：「佇一寡(外國)立法經驗，發見講真捷發生你對一寡勞動條件做認定了後，平台就有一寡相對應的調整。致使這个認定佇事實上就有一寡困難。」
工會表示，雖然現此時，工會佮平台之間會開會，但是平台方面派出來的代表，定定無調整權益的權力，攏是消極的回應；若是一直欠缺專法，平台佮外送員之間的權力關係都會一直無對等。
買湘瑩/編輯
