農委會研發AI代替動物 測試農藥對人的過敏性
郭柏均 張育睿 / 臺北報導
發布時間：
更新時間：
目次
真濟物件欲用佇人頂頭，進前攏愛先透過動物試驗，毋過按呢無人道。最近、農委會、藥毒所、國衛院、佮台大合作，建立「皮膚過敏性評估、人工智慧、演算平台」，透過AI佮人體細胞試驗，就會使知影、化學品、敢會害咱過敏。(本則新聞標題、導言、內文皆為臺語文)
用電腦操作，就會使知影化學品敢會引起人體過敏。農委會的農業藥物毒物試驗所、參國衛院佮台灣大學合作，推出農藥的「皮膚過敏性評估人工智慧演算平台」。往過人體敢會過敏、需要經過動物試驗，這馬會使透過AI辨識化學品的結構等等、配合人體細胞試驗就會使得，毋免傷害動物。
農委會藥毒試驗所副研究員 廖俊麟表示：「上早是用天竺鼠試驗，就是共天竺鼠頂懸的皮膚攄掉，攄毛了後會共有摻農藥的貼布，貼咧天竺鼠的皮膚，這部份可能就較會造成動物的無爽快」
研究團隊表示，過去這款技術佇國際上使用咧化妝品較濟，這馬用AI模型配合台灣累積的農藥試驗數據等等，發現做出來的結果、參過去透過動物實驗估計人體反應的做法相比並，準確度相siāng、甚至閣較懸。毋過團隊也表示，數據收集方面猶閣有進步的空間。
台大獸醫學系副教授 王家琪表示：「若是以後有計畫經費入來，有閣較濟是農藥的結構成份的時，當然伊就會使增加預測準確度，畢竟這部份佇開發的早期，大部份攏是化妝品的資料較濟」
團隊表示，往過的動物試驗方法，一擺試驗需要犧牲30到60隻動物，過程需要21到35工；現此時透過平台，會使縮短至4工左右，而且免犧牲任何動物。未來也希望這个平台會使推廣到其他所在，試驗藥品、抑是環境化學品等等的安全性。
鄭雅存/編輯
專題｜改造地獄路 台灣行人路為何難行？
