特教生較僫揬鼻仔 民間捐喙瀾快篩協助防疫
林緯廷 / 嘉義報導
發布時間：
更新時間：
目次
為著欲予一寡仔身心障礙的特殊教育學生，莫因為揬鼻仔快篩受傷，這陣有在地的善心團體捐喙瀾快篩試劑，予嘉義特殊教育學校佮嘉義市政府，希望會當照顧著身心障礙者。
老師配合教材替特教學生上課，一寡仔厝內無法度照顧的囡仔，猶是會轉來學校予老師照顧，學校講特教生佇厝內上課拄著的問題較濟，所以家長的配合誠重要。
國立嘉義特殊教育學校校長 陳錫輝表示：「咱囡仔的特質就是袂像普通的囡仔會乖乖坐咧，這个時陣可能著需要爸母較濟協助。阮除了線頂教學以外，事實上阮老師嘛一直逐工攏有佮踮厝內的囡仔連絡」
除了線頂教學需要家長配合，本身嘛是特教生家長的台灣民眾黨嘉義市黨部主委，嘛邀請在地善心團體，捐600組用喙瀾篩檢的試劑，予特教學校佮嘉義市政府。
民眾黨嘉義市黨部主委 吳亭蓁表示：「我替阮查某囝做鼻橐快篩採樣的時陣，其實拄著誠大的困難，佇過程當中伊會一直反抗，定定會造成伊流血」
嘉義市政府社會處長 林家緯指出：「有兩百劑嘛會留予咱各國中小的特教生囡仔，另外閣有一百劑這个部份，阮會用佇弱勢民眾尤其是囡仔，或者是佇機構內底的身心障礙者抑是街友」
嘉義特教學校表示，學校目前照顧的學生，對學齡前到高職計共有205个學生，遮的喙瀾快篩試劑，方便學校替學生做篩檢，嘛會閣較安全。
2022杭州亞運 台灣百金之路
