2025連翹自由節 多元藝文了解臺灣民主過程

「遮袂當賣薰！」
「大人歹勢啦，因為阮翁去南洋做兵……」
「袂當賣就是袂當賣！」
「毋是啦，我閣有囡仔欲飼……」
「閃啦！」

用光影呈現二二八，警察咧臺北天馬茶房查緝私薰的事件，嘛帶出臺灣史上有名的版畫〈恐怖的檢查〉，這齣戲就號做「慢慢」。

「夾腳拖劇團」結合臺灣畫家的作品，包括郭雪湖的〈南街殷賑〉、陳澄波的〈嘉義中央噴水池〉等等，用遮的畫來發想，希望透過光影的演出予民眾了解臺灣民主化過程的故事。

夾腳拖劇團團長 吳易蓁：「臺灣有一寡歷史的時間是烏暗的，猶毋過有足濟偉大的人，替咱做足濟代誌，所以阮用光影來呈現怹的身影。佇這齣戲內底嘛有，用光影做幾个美術家怹畫的圖。」

二二八國家紀念館，九月邀請夾腳拖劇團和銀河谷音劇團，來參與2025年連翹自由節，推出齣戲佮臺語講故事，嘛欲招民眾做伙來看紀錄片，親像《尋找湯德章》對無仝人的角度呈現湯德章的故事，也有《二七部隊》咧講臺中的二二八事件等等，攏總8部紀錄片。

二二八事件紀念基金會執行長 藍士博：「臺灣文學的作家吳濁流，作家伊上重要的作品，就是咱咧講的《臺灣連翹》，連翹就象徵講臺灣人堅定的精神。譬如講年初紀念二二八，後半年會使透過藝術知影講，規个整個臺灣民主人權發展的過程，予爸爸媽媽會使怹囡仔來。」

今年連翹自由節，結合親子劇場、臺灣文學佮紀錄片，活動辦到11月初2，民眾通免費參加，二二八國家紀念館希望透過各種藝文形式，予民眾慣勢對平常時，就來親近人權、歷史議題。

記者 呂尚儒 莊浚佑 臺北報導