「母語囡仔窟」大人囡仔踅菜市仔 趣味學臺語
張君豪 / 新竹報導
發布時間：
更新時間：
去傳統菜市仔買菜，一般攏是台語上蓋好用，講台語嘛感覺較親切。新竹母語囡仔窟定定舉辦母語推廣活動，就專工陪囡仔去竹東的菜市仔，頭家嘛用台語紹介家己所賣的物件，欲用上自然的方式予囡仔對生活中學台語。(本則新聞標題、導言、內文皆為臺文)
擔仔頭家：「這是石斑，這是虎斑。石斑有十幾款，這就是虱目魚 閣有虱目魚肚。」
頭家用親切的台語向逐家紹介海產，無論是石斑、虱目魚抑是蚵仔、透抽，逐家攏真認真咧聽。
擔仔頭家：「客話叫婆菜，婆就是糋的意思。台語號叫菜糋，嘛會當講糋菜，倒翻正翻攏會使。」
後一攤來到賣糋粿的，頭家講一般台語號做菜糋，客語是講婆菜，逐家聽了感覺真心適。
參與民眾：「來遮就會提醒家己，愛參(囡仔)講台語，較袂去袂記得。（平常時敢會ﰓ囡仔去踅菜市仔)會啊，我去買菜攏會綴邊仔。」
參與民眾：「（按呢台語敢會較進步) 一定會，團體會較捷講，嘛會講較好。」
來到菜市仔買菜，真濟人攏會用台語來溝通，除了因為頭家、頭家娘較濟歲數原因以外，用台語來買菜聽起來嘛更加有人情味。
新竹母語囡仔窟台語老師 蔡秋芬：「菜市仔內底頭家的台語參客語一定是足好的，所以攏毋免特別煩惱袂曉講，囡仔嘛會當加看看的，平常時看著食飯桌頂的物件攏是已經煮好的，囡仔真濟攏無看過猶未煮過的物件。」
參加完活動逐家攏講，菜市仔參一般的超級市場比起來，除了有閣較濟人參人之間的交流以外，嘛會當親身感受著頭家的熱情。
買湘瑩/編輯
2022杭州亞運 台灣百金之路
