228事件中負責醫療 黃文醫生舊厝當咧整修

古蹟修復的工作團隊，提設備測量這間厝內底的各種資料，這間有88年歷史的黃文醫生故居，修復工程已經開始。
實式木造執行總監 蔡有哲：「這間厝誠久無整理，厝頂閣有破空，然後厝有漏水的問題，漏水的問題，嚴重影響厝內底的柴結構品質。」
這間起佇1935的厝，進前捌是翕相館、食堂喫茶部，1958年才予黃文醫生買起來改作診所佮徛家。2020年通過指定做嘉義的市定古蹟，按算修復了後，欲來推廣健康醫療。
嘉義市文化局長 盧怡君：「現任厝主王醫師主動提請文資相關的審議，希望會當揣著這間厝的文資價值，所以經過文資審議的會議，共這間厝提升做嘉義市的古蹟。」
文化局表示，黃文醫生佇嘉義的醫療史佮教育史，閣有228事件當中，攏是誠重要的人物，希望透過古蹟修復，成做地方創生的新場所。