嘉義市美術館陳澄波特展 敆文學.音樂創新體驗
林緯廷 / 嘉義報導
發布時間：
更新時間：
目次
嘉義出身的畫家-陳澄波已經過身75年，嘉義市美術館佮陳澄波文化基金等單位做伙舉辦「人．間－陳澄波佮畫都」的展覽，除了畫家的創作，閣有伊佮藝術家朋友批信往來的收藏，這展覽嘛結合文學、音樂佮劇場內容，希望民眾透過無仝的感受，來認捌這位真重要的臺灣畫家。
一張一張的相片佮資料，呈現嘉義出身的出名畫家陳澄波的過去，陳澄波文化基金會前年捐59件收藏予嘉義市美術館，其中有15件是陳澄波佮朋友的批信往來。
嘉義市美術館長 賴依欣指出：「包括像林玉山、張李德和林玉書等等，彼个時代的創作者，IN是如何互相交流佮互相創作；遮的作品當做禮物，IN閣是按怎來收藏」
民眾表示：「除了會當看著陳澄波的作品之外，嘛會當看著陳澄波，閣有彼當陣藝術家的一寡仔連結，互相送禮交流等等，我感覺是一件誠有意義的代誌」
將近一百件的作品佮文件，欲予民眾欣賞佮了解陳澄波以外，嘉義市美術館嘛頭擺邀請無仝領域的藝術家，希望民眾有無仝看展覽的體驗。
民眾表示：「會當近距離來看畫，徛近作品頭前，然後知影看伊的畫，心內是感覺誠感動」
賴依欣指出：「美術館大部份攏是提供視覺藝術的表現，透過文學、音樂佮劇場，其實嘛會當提供無仝的藝術創作感覺的這種體驗」
美術館表示，佇這改陳澄波的展覽當中，毋但有伊的收藏佮作品，嘛是75年來頭擺用系統化的研究展出，除了欲予看的人了解陳澄波對藝術的影響佮重要性，嘛希望會當用在地的觀點，傳承嘉義的畫都精神。
專題｜改造地獄路 台灣行人路為何難行？
