臺灣能源轉型挑戰大 "核四重紡"正反方說心聲

鹽寮反核自救會前會長吳文通：「上遠看著的是二號機，閣過去是一號機。」

吳文通就蹛佇摃仔寮的仁和宮附近，核四廠區佮仁和宮干焦隔一堵壁，發電機組佮反應爐就佇1.5公里外爾。吳文通講，原底大部份居民毋知土地為何予政府徵收，80年代尾期，開始有環團佮學者來、in才知影核四，落尾嘛對核二廠周邊居民的口中，知影核電廠的影響。

鹽寮反核自救會前會長吳文通：「In漁民拄漁民佇海上攏會對講、對講機攏會對講，講啊恁千萬毋通予摃仔寮閣起核能電廠。阮這漁業、海菜啥物，完全攏受著損害。」

摃仔寮居民發覺核能電廠對家己的影響，嘛開始了解核能有輻射安全的問題。毋過重啟核四提案人黃士修認為，核能安全經過把關，是有保障的。

重啟核四公投領銜人黃士修：「所以試運轉測試佮安檢驗證，阮攏會進行，而且阮要求愛倩國內外的專家共同來檢視。」

黃士修對2018年的以核養綠公投，就希望共核電比例提懸至20葩、取代燒塗炭發電，來改善空氣汙染。伊肯定發展再生能源，但是認為再生能源無夠穩定、價數較貴。若是重啟核四，伊希望核電對這馬佔整體8葩左右，漸漸來提懸。

重啟核四公投領銜人黃士修：「再生能源100的單位裝置，可能干焦會使發30葩的發電量；因為伊效率轉換的問題，但是核能佮火力會使到90葩以上。佇英美法國其實in嘛是核電，支持電力結構的重要占比。」

另一方面，若是重啟核四公投無過，而且核能占比嘛降低，台灣敢會赴揣著適當閣充足的再生能源？

地球公民基金會副執行長蔡中岳：「咱需要一寡仔時間，予台灣揣著較適合的再生能源。這个時間先用天然氣，來換咱燒煤這件代誌，換愈濟愈好。其實就減碳、減咱的空氣汙染。」

大量提升再生能源占比，是環保團體的目標佮向望，毋但是為著環境，嘛是為著符合RE100百分之百使用再生能源等等企業經濟考量。in也了解，佇過渡期間甚至未來，台灣用電習慣嘛是重要議題。若是用電成長率比過去規劃的閣較懸，就算達成原底設定的能源目標，猶是可能有電力無夠的問題。

地球公民基金會副執行長蔡中岳：「咱的用電成長率本來評估1.5葩左右，2021年咱上看2.5到3葩。節能、甚至電費的合理化調整，毋是一直想辦法去開發新的電力，因為咱無遐爾濟空間佮土地通用。」

目前有再生能源2025年提升到20葩的目標，毋過今年為止，再生能源佔整體發電量差不多5葩，再生能源因為發電裝置地點選擇問題等等，進度有較慢；除了這以外，再生能源的供電穩定度，嘛受著大眾質疑；這敢會相連紲影響著電費等等，嘛是逐家關注的問題。

發展核能的部份，核廢料雖然會使封存隔離，但是欲囥佗、是真受著爭議；繼續起新的核能機組，是毋是會造成閣較濟地方抗爭？猶有核能若是真正發生意外災害，國土無大的台灣敢有法度承受？攏是備受爭議的問題。