小說"等路"著臺灣文學獎 洪明道今閣出臺文版
鄭雅文 林郁凱 / 台北採訪報導
發布時間：
更新時間：
作家-洪明道，進前出版《等路》這本小說，透過庄跤小人物來表達對鄉土的情感。這改伊揀出幾若篇原本的文章，出版台文有聲冊，希望逐家會當用台灣氣口來讀小說。
「抐桮白色的鳥仔毛，共彩雲掰過，一點一點tòo著，一寡湠開的色水。」
小說等路的作者洪明道，本身是醫生也是作家，兩冬前才提著台灣文學金典獎等等的獎項，這改隨閣新出台文版。
作家 洪明道表示，「因為彼陣的台語程度寫字的程度閣無夠好，所以彼陣著用華語、台語透濫的方式來寫，到尾仔沓沓仔學台語文了後，有一个能力會當來寫全台文，所以就想講共這个故事重寫轉來做全台語。」
洪明道為著寫好台文，學台文除了出台文冊，閣有聲版本，聽的時陣，就像咧聽故事。「巖仔透早只有兩三个遊客上山靜修，攏佇這个時仔去趨崎彼旁摘菜。」
冊內底除了揀選進前的五篇文章，閣加入一篇巖仔。伊用返鄉抑是庄跤的人做主角，點出佇傳統規範之下的衝突、適應、出走。其實也反映伊家己，對家鄉的一寡感情佮選擇。
作家 洪明道講，「我受教育攏是踮外口，所以有一个過程就是我是去台南讀冊，閣來到台北讀大學，所以有一个過程就是會重去認識我這个故鄉。」
九歌出版社有限公司總編輯 陳素芳表示，「伊掌握著台灣人有一種趣味，但是這个趣味背後實在是有淡薄仔悲傷，伊其實是這種對命運無可奈何，所以只好用這種笑詼的方式來表現。」
出版社表示，冊內底的人物原型就佇台南、岡山一帶，所以共遐的生活中的語言表現出來，是真重要的代誌。等路的冊名，台語就是禮物。作者也透過冊內底的小人物，tshuā-niá讀者做伙佇冊內底揣一个性命的出口。
