工程師研究臺灣歷史 修復相片再現古早時

西門町佇一百年前是啥物模樣咧？有一位來自臺南的工程師，對臺灣文史有誠大的興趣，對二十冬前開始研究臺灣歷史、收集老相片，共遮的老相片重閣食色，變做迷人的景致。

西門町紅樓是日本時代起的市場，過去市場邊有濟濟的擔仔，猶有日本神社，共這張黑白相片重閣做色，當初的面貌就攏看現現；對台灣文史有濟年研究的王子碩，毋但收集、修復老相片，兩三冬前嘛開始替烏白相片落色，希望利用相片將過去的歷史，一張一張鬥出來。

烏白相片有色水以後，細節、內容攏會閣較顯頭，王子碩落色嘛會參考文字紀錄、請教專家，盡量呈現上原始的模樣。

王子碩收集來的相片，嘛和濟濟單位、個人合作，提供展覽、研究，像這幅大安病院頭前台灣民報派報的相片，就是王子碩重新落色的。

台灣的街頭巷尾、建築風華、攏是成就歷史的重要元素，王子碩講，他所整理收集的文史資料，攏是公共財，有適合的就會捐出去，若是能力範圍內的邀請合作，伊嘛攏會盡量配合，欲和有志做伙推捒臺灣文史。