車鼓陣保存者施朝養過往 學校出版繪本紀念

臺灣頭一位登錄的車鼓陣保存者-施朝養藝師，佇頂個月過往，彰化市忠孝國校仔的老師佮學生，拍算欲出一本、施朝養的車鼓陣繪本，共過去學生囡仔拜訪施朝養的資料.訪問，紀錄落來，欲用繪本紀念這位國寶級的車鼓陣藝師。


一筆一筆，共車鼓陣藝師－施朝養表演的畫面畫落來，這陣忠孝國小的學生，半年前捌去拜訪已經過身的施朝養藝師，想起當初施朝養的表演佮分享，學生攏真數念

學生：「去揣阿祖(施朝養)的時，阿祖閣有唸四句聯予阮聽。」
閣有學生講到：「阿公教阮tshiâu-á，呵咾我足厲害的。」
學生：「我感覺阿祖真活潑真趣味，我這陣畫繪本感覺足有意義」

台灣傳統技藝推廣協會佮學校合作，今年向文化部申請經費，按算出版施朝養藝師的繪本，雖罔這个計畫因為施朝養藝師過身中斷去，但是學校佮協會決定用募資的方式，予繪本順利出版

忠孝國小老師林晉任：「囡仔有親自去訪問過阿公(施朝養)，所以in對遮的畫面真有印象，所以會當創作出遮濟遮爾好的作品。」

台灣傳統技藝推廣協會理事長楊玉如表示，遮的繪本會使予佮意車鼓陣，抑是傳統文化的人來收藏，所以in繼續來共這个計畫做落去。

學校表示，屬於南管系統的台灣車鼓陣，透濫歌舞陣頭、牛犁陣、水族陣的表演，是誠有代表性的台灣傳統文化，希望透過囡仔的創作，共施朝養藝師精彩的一生紀錄落來，予這位國寶級的車鼓陣藝師，永遠記佇逐家的心肝內。