臺灣戲曲藝術節「非常愛」 11團拚場講無仝的愛
發布時間：
更新時間：
今年臺灣戲曲藝術節，主題是「非常愛」，邀請11个劇團，有的講迒時代的愛、陰陽之間的愛、人佮物品的愛，用戲劇來呈現、討論無仝款的愛，嘛望吸引少年觀眾來看戲。（此則新聞標題、導言、內文皆為臺語文。）
布袋戲演出一个人，戀愛的對象是一口劍。愛毋但可能佇男女之間、抑是同性之間，愛上物品的「戀物」，嘛是一款愛，劇團用布袋戲來呈現。
真雲林閣掌中劇團導演 李昶旭，「這寡物品其實是會有人的，一个人會附加伊的感情佇頂懸，戀物這个主題佇現代劇場也好，抑是講戲曲也好，其實是較罕得討論的情慾面向。」
今年臺灣戲曲藝術節主題，「非常愛」，攏總有11齣戲，不是講一些古板、談情說愛的愛情故事，是用傳統戲曲來討論現代新興愛情議題。
國立傳統藝術中心副主任 陳修程，「人佮非人、陰陽兩界的愛，所以其實有足濟題材會當用傳統去詮釋愛這件代誌。」
傳藝中心表示，有真濟劇團維持傳統，嘛打拼創新，望傳統戲曲通以全新的模樣來展現。
真雲林閣掌中劇團團長 李京曄，「型式改變以外，上蓋重要的就是，劇本咱嘛一直咧探討無仝款的物件，為啥物欲創新，因為原本的觀眾沓沓仔無去，咱這馬咧講感情，咱這馬咧講反戰，其實攏佮咱這馬，你這陣現在、當下的生活真有關係，這幾冬其實有足明顯的進步，阮的觀眾嘛一直有咧增加。」
時代咧變，傳統戲曲因應潮流，綴咧講現代事，望講用無仝的愛，創新、豐富當代戲曲，也望唌少年輩願意走進來劇場看戲。
熊楚瑜/編輯
