嘉義興安國小組北管樂團 教囡仔認捌傳統文化

佇地下室內底，20外名學生，做伙咧練習北管。IN是興安國小的北管樂團，嘛嘉義市內目前唯一一間推廣北管的國小。
教北管的老師講，這是傳統的音樂，所以工尺譜、唸古詩逐項攏愛學，毋過為著欲予囡仔看工尺譜看會慣勢，嘛有去改變譜的印刷方式。

北管老師 黃麒晏：「上傳統的以前老師按怎共阮教，我就按怎落去教遮的囡仔，當然阮有共阮的譜小可仔改過，就是以前的譜是直的，我這馬改印橫的，予囡仔方便去看遮的譜」

興安國小的校長講，佮國外的學校交流的時陣，攏想欲向外國人來紹介臺灣這項傳統的音樂文化，五年前才會佇學校內底成立北管團、推廣北管，學生佮家長的反應攏袂䆀。

興安國小校長 查顯良：「咱欲佮國外的囡仔來做交流的時陣，咱欲提啥物物件是咱臺灣上傳統，上代表咱臺灣味的物件，咱的北管戲曲就是足重要的，一件會當來交流的文化」

興安國小學生 陳宥憲：「這个樂器就是強欲消失，就是欲予現代的樂器來取代，所以我就想講來學這，希望以後就是有閣較濟人來學這」

校長指出，市內的囡仔，若想欲瞭解北管，攏愛等有廟鬧熱才較有機會，這馬有專門的課程，就是希望予囡仔會當對細漢就認捌，北管所代表的臺灣文化。