臺博館辦戰後建築師制度展 紹介行業歷史變化

國立臺灣博物館最近舉辦二戰過後、台灣現代建築師制度演變的特展,紹介建築師制度,嘛予民眾閣較了解台灣的建築史。

影片是台灣早前的高等考試,也包括建築相關考試,臺博館最近舉辦二戰後臺灣現代建築師制度的演變展覽,紹介對殖民時代到國民政府沿用南京制度閣到美援時期,輸入現代體制,建築這个行業的歷史演變。

國立臺博館展示企劃組副研究員 林一宏表示:「美援的時陣,美國人用這種貸款予你,伊其實愛看你提出來的設計圖,伊愛審查,審查的話愛照in的規矩,就是in的施工圖的畫法,參咱較早慣勢的日本時代的方法完全無仝款」

像圖框、簽名的方式就沿用到現代,臺博館表示,這改展覽紹介建築技士到建築師制度化等過程,民眾也通透過內底幾个重要建築的資料、文件,認捌無仝時代的建築背後的時空背景,像逐家熟似的故宮博物院。

國立臺博館展示企劃組副研究員 林一宏指出:「1960年代的台灣是佮中國對抗的狀態,對岸遐文化大革命,咱這爿咧做啥物,中華文化復興的運動,到尾才會起出這種中國式的這个博物館的建築」


臺博館表示,民眾通對館內建築模型、歷史年表等文件,回顧臺灣早期建築發展,也呈現出無仝世代的建築人,按怎佇困境之下改造實質環境。

全台敬老金大調查

相關新聞