嘉義興安國校拍鼓社團 逐年風鈴木花開時演出

嘉義市興安國小的拍鼓社團,便若到黃花風鈴木開花的時陣,社團師生,就會行路去駁岸,佇花大開的景色當中,拍鼓發表練習的成果,十外年來,攏維持這个真特別的傳統。

嘉義市軍輝橋邊仔的駁岸,這站仔黃花風鈴木當開,天氣好的時陣除了有誠濟民眾會來遮散步翕相,附近興安國小的鼓隊嘛會來遮拍鼓。

興安國小鼓舞擊樂團指導老師 楊文菁表示:「囡仔學校行來遮,其實遮是平常時活動的所在,會當共學習成果展現予逐家,希望逐家除了欣賞美麗的風景以外,閣會當聽著好聽的音樂。」

興安國小的拍鼓社團,對2001年成立到今,不斷推廣鼓藝,只要駁岸的黃花風鈴木開花,就會對學校行來遮表演,十外冬來已經成做鼓隊的傳統。

興安國小譚同學:「就是阮疫情期間真少出來表演,但是這改出來表演,就是一个真難得的機會,所以我感覺愛好好仔珍惜。」
 

嘉義市興安國小校長 查顯良表示:「囡仔佇教室內底拍鼓演奏,佮佇自然環境內底,黃花風鈴木的風景佮感受,是閣較無仝 閣較好的感受。」

興安國小講,鼓隊的風格來自十鼓擊樂團,佇傳統當中閣有創新的元素。學生嘛表示,逐冬行路來遮演出,除了是成果發表,嘛希望會當延續學長、學姐傳落來的這項趣味閣特殊的傳統。



 

相關新聞

專題|全台敬老金大調查