帕運國手無專屬場地 選手.教練望國家重視
楊舒晴 謝季潾 / 台中-台北採訪報導
發布時間：
更新時間：
2020東京帕運咱臺灣第一擺有電視轉播，民眾的關注也增加袂少。事實上，臺灣代表團早佇1992年就開始參加帕運，往過也攏有提牌的好成績；毋過仝款是代表國家比賽，帕運選手的獎金煞只有奧運選手的四分之一，也無專門的國家訓練中心。
行入店內，滿滿的運動獎牌，遮是今年帕運的掌旗官，楊川輝的掠龍店，楊川輝國校仔開始練田徑，毋但提過國際賽走一百公尺的金牌，目前也是男子T11級跳遠的亞洲紀錄保持人，過去參加比賽，其實定定是訓練兼掠龍。
跳遠國手楊川輝：「國家進前、佇這遍疫情進前，亞運佮奧運的集訓費干焦有三個月爾，平均一工四百箍，我感覺足困難的。」
那練習那趁所費，是目前大部份身心障礙運動員，攏會拄著的問題，除了煩惱生活，其實若有比賽欲集訓的時陣，場地也著四界撨摵。
2020帕運跳遠國手楊川輝：「平常時我就是愛對靜宜大學坐兩點外鐘的公車去台灣體大，去遐訓練了後才閣坐兩點鐘的車轉來，其實資源上感覺真正足少的。」
體育署全民運動組科長張永光：「猶毋過選手足濟，無可能佇台中設一个中心嘛；台北的選手可能會講足忝、高雄的選手嘛仝款，按呢是較無可能啦。」
2020東京帕運代表教練張福生：「你上蓋無講有一个場地予in家己有法度，佇咧袂去佮人有牽抐的情形下安全運動。咱就無一个專屬的場地，總講一句，無支持啦。」
尤其帕運選手用仝款強度的訓練，有的選手程度並無輸一般選手。
2020帕運跳遠國手楊川輝：「台灣的政府攏講、佇進前攏講阮是復健的運動，但其實2016的時陣，阮目睭無看這級的千五公尺，阮前四名猶走比彼屆的奧運金牌較緊。」
體育署全民運動組科長張永光：「當然阮嘛希望阮的選手有遮爾懸的水準、競技水準去參加奧運，這嘛是我真期望的。」
帕運參奧運屬於仝等級的國際比賽，攏是專業競技水準，但是帕運的資源、受訓制度煞共奧運袂得比，政府毋知是用啥物態度，向望選手提著好成績？
