國立臺灣美術館，兩年辦一改的亞洲藝術雙年展，十月底開幕，以臺灣建築師王大閎的科幻小說"幻城"做靈感，展示15个亞洲國家的作品，鬥陣來眼界一下。
行入國美館大廳，捅過醒目的走廊，向檢疫員領一張貼紙，新的城邦旅程正式開始。
頭一件作品、也是現場唯一一件建築師創的作品，科技感的藍色燈光共中國式八角門、圓窗，和代表網路連結的天篷、傳統紅色柱仔照予光，就是欲呼應這改國美館亞洲藝術雙年展的主題「未至之城」，代表對未來的想像。
究境聯合建築師事務所建築師魏子鈞表示，阮的作品真重視現代的體驗，阮希望觀眾會當佇內底，體驗著台灣建築的現代化，其實真重要，阮是一種濫血的概念，咱有西方的理念嘛有中國的理念，嘛有咱台灣在地的理念，遮爾複雜 遮爾多元的思想，會當直接表現咱台灣的現狀，就是非常多元環境的社會。
「未至之城」臺灣策展人高森信男表示，這次2021亞洲藝術雙年展，阮有真濟亞洲的藝術家，In咧講的未來，毋是in家己烏白講的，這是為著咱今仔日現實的問題，發展出來對未來的看法，逐家會當對展覽來思考，咱未來會生做啥物款，會拄著啥物問題。
燈光閃爍的大幅看板，反映台灣對1980年工業社會對未來繁華的向望，台灣藝術家李勇志的作品，也予人印象真深。
民眾表示，，有關動態的流動，對銀幕頂的線條，和往過的作品真無仝，現在的衝擊力閣較大，咱欲按怎去接受這款的衝擊力，和遮爾強的目光，對視覺 也有聽覺，感官遮爾豐富，按怎去消化。
對柬埔寨藝術家的攝影作品，反映城邦發展中，大自然和都市開發的衝突；韓國釜山海底的實驗室、海草礁做成的裝置藝術結合影像，展現氣候變遷人類生活受衝擊；到日本藝術家以大自然的聲音表示隔離的孤單和世界脫離的感覺。
國美館兩年一改的亞洲藝術雙年展，雖罔因為疫情無外國客到場參觀，不過15个亞洲國家，38組藝術家和團隊綿爛參與，in的作品予濟濟人對亞洲未來主義，有閣較濟寄望和想像。
