文協成立滿100年 作家仕紳用文學說殖民艱苦

臺灣文化協會到今已經100年,佇彼當時的作家-賴和,佮工人運動的盧丙丁等人,攏認為資本主義和勞工階層那行那遠,𪜶就寫新文學、畫勞工,唱百姓受殖民的艱苦,行出左派路線。最近國立臺灣文學館有特別辦展覽,予民眾了解百年前,𪜶替臺灣文化所做的拍拚。

模擬賴和講話:「國立臺灣文學館百年情書特展,我是賴和,彰化人,佇開醫生館,我有時仔寫漢詩,寫新文學的小說、散文和詩,佇咧臺灣民報文藝欄做主編時,鼓勵逐家寫出當時時代正正的狀況。」

佇1920年代,彼个報紙頂新舊文學吵吵鬧鬧、冤袂停的時期,台灣文化協會重要成員賴和就曾講過,語言只是一个工具,伊認為貼近各階級話語的新文學,才是上適合大眾的。

臺灣文學館研究典藏組長,林佩蓉表示:「所以賴和咧提醒遮的智識份子,毋通家己講家己佮意代誌,也是重要的代誌,你應該愛回頭去看,你後壁的大眾敢有綴起來,規个展覽就是想欲對這个物件來出發。」

臺灣文學館展示組研究助理,王嘉玲表示:「阮用一个技術叫做深度偽裝技術,就是請這馬的演員,演𪜶少年會講的話,舊的相片用電腦共伊算出來,來和大眾講𪜶想欲和大眾講的話按呢。」

仝款是文協重要成員的工人運動領袖盧丙丁、民間文學家李獻璋、音樂創作者林氏好、畫家陳澄波和小說家楊逵,因為看見日本殖民時代,階級分化情形嚴重,所以決心行出較左派的路線,用𪜶的創作和疼心、了解百姓受剝削、誣賴甚至歧視的各種艱苦。

「想欲結髮 傳囝孫 無疑明月」

這塊1934年古倫比亞公司發行的「一顆紅蛋」,就是盧丙丁的太太林氏好演唱,輕鬆的JAZZ曲風,除了說出傳統女性無法度生的哀怨,也暗指對日本殖民統治的不滿。

臺灣文學館研究典藏組長,林佩蓉表示:「設署這个文化運動,是會當幫贊人民的生活做改變,敢講是透過演講,透過共你講衛生、準時、科學遮的物件,咱就會當改變咱的生活,阮希望拍破一个物件就是講,媠的學歷抑是好的成績,敢講就是上重要的代誌?對土地有疼心,對散食人有同情心,對社會代誌有關心,按呢的少年人,才是咱這馬台灣所需要的氣力。」

臺灣文學館館長,蘇碩斌表示:「咱就愛了解講一百冬前,其實彼此个時陣咱逐家咧奮鬥的是啥物,因為應該摻咱這馬差誠濟,猶原有一个精神一直閣留落來咧,我感覺就是講文明、自由佮平等。」

1921年文協成立到今,對日本殖民、白色恐怖、解嚴到當代,國立臺灣文學館希望以這6位前輩留落來的文學創作和思想,包裝像情批的概念,和現此時的咱對話,望延續文化能量也記錄一路行來的跤跡。

相關新聞

專題|全台敬老金大調查