市面上，較罕得看著有臺語的音樂繪本。為著推捒公民意識和母語，本身是臺文系教授，嘛是社會學者的莊佳穎。就決定向文化部請經費，將伊和囡仔創作的故事，結合動畫佮手語，欲將in對母語的愛，分享予閣較濟人。

戴黑貓形體的頭鬃箍仔，莊佳穎老師拄對台師大下課趕去幼稚園，今仔日欲分享的，就是伊和伊的雙生仔後生阿慎、阿鎮同齊創作的「石虎的故事」。

故事主角號做阿石的這隻石虎，希望向人類宣揚保護樹林和保育類動物的重要性，替伊配音的就是阿鎮本人。

莊佳穎是台師大台文系副教授，是社會學者、音樂創作者、嘛是母語媽媽，因為市面上的音樂專輯和音樂繪本囡仔攏掀甲差不多矣，伊就決定向文化部請經費，將伊和囡仔佇眠床邊編出來，結合環境意識和自我認捌的故事整理起來，先做繪本、閣來出有聲冊、落尾閣家己出錢做手語翻譯。

開冬半的時間創作的三本動畫繪本，對囡仔的生活經驗出發，也是莊佳穎佇生活中實踐母語的方式，伊希望當代囡仔人有多元的閱讀選擇，也向眾人分享這份in對母語的愛。