教育部設樂器銀行收中古貨 提供偏鄉學校使用

臺灣定定有用袂著的物仔,提出來做愛心義賣。這馬也有中古的樂器,所組成的「樂器銀行」,教育部結合產業、官方、學校三方面的資源,收集各界所捐出來的樂器,若準偏鄉學校有需要,就會當來申請使用。

學生佇台頂演奏美妙的樂聲,這陣囡仔使用的樂器,攏是來自樂器銀行,各學校用袂著的樂器,閣有民間團體佮產業界的寄附,欲來支持偏鄉學校的音樂教育。

這位來自卑南國中的學生,喙脣到下頦這逝長疧(khî),是因為普悠瑪反車事件留落來的,學校因為這層意外,失去兩位老師和三位學生,學校用音樂tshuā領師生行出悲傷

教育部對2016年開始,委託實踐大學辦理樂器銀行,希望豐富偏鄉的音樂資源,這幾冬落來計共募著兩千一百十九件樂器,媒合成功兩百五十外間的學校

教育部長潘文忠表示,樂器銀行其實是教育部咧推動美感教育內底一項真重要的計畫,樂器銀行會當順利執行,是產官學共同拍拚的成果,嘛鼓勵學校、民眾共用袂著的樂器捐出來,予偏鄉學校有閣較濟接觸音樂的機會。

相關新聞

專題|全台敬老金大調查