"裝咖人"樂團出專輯仝名小說 寫臺灣民間歷史

今年才入圍金曲獎的裝咖人樂團，最近新出一本佮專輯仝名的新冊，團長張嘉祥表示，伊自五冬前就開始籌備出唱片佮冊，兩个物件相關聯。

團長張嘉祥講，「內底的故事，也是咧講專輯的故事，咧講我細漢時一寡仔童年的記憶，一寡仔較魔幻的物件，可能鬼仔古，有規个民雄地區發生啥物代誌，規个嘉義的歷史發生啥物代誌，佮規个台灣文化。」

冊的內容也算是唱片歌詞的長篇，將地方野史、鬼神信仰、二二八歷史等等摻入去內底，閣較記錄一寡仔底層人物。張嘉祥表示，像伊問過家己百外歲的阿公庄頭的歷史，就會官方歷史無仝。也因為咧寫家己細漢的記持，就用台文來詮釋。

團長張嘉祥講，「我較早細漢的記持攏咧講臺語，我愈寫的時陣就感覺講，我應該用臺語來寫這項代誌，但是我受的教育，我受的教育內底，攏是華語的教育，寫的文字攏是華文，我就忠實呈現按呢的狀況，我著有時陣華文有時陣台文。」

冊內閣較有原住民語、客語等等，伊認為這馬是多語言的時代，所以愛完整呈現。張嘉祥希望讀者佮樂迷通共文字佮音樂相佮，那聽那看，得著全新的體會。