臺鐵企業工會:若無看著政府善意 五日節嘛毋加班

陳情民眾：「安全改革，基層參與。」

共頂懸寫公司化就是安全的雞胿仔揬破，象徵揬破台鐵局佮交通部的白賊話，台鐵產業工會12點半對捷運臺大病院站出發，原底欲遊行到總統官邸表達in對台鐵改革的訴求，毋過佇中山北路佮愛國西路口就予警方兩擺攑牌共警告阻擋。

臺鐵產業工會理事長 王傑表示：「真濟民眾佮媒體無了解工會的訴求，認為工會就是欲反對改革佮公司化，阮各部會攏去過，各院攏去過，佗位無去過，遮的去過的所在，請問政府敢有回應過，工會是上想欲台鐵安全的人。」

台鐵產業工會強調，台鐵這馬欠缺佮基層溝通的制度，基層欠人、欠料的狀況攏無法度反映，著愛面對真懸的職業安全風險。落尾工會遊行到總統府頭前，參加勞動團體佇凱道舉辦的五一勞動節活動，今年的受著疫情影響，原底的遊行改做定點集會，嘛縮小規模，現場大概有七百外人參與。

全國產業總工會理事長 江健興：「欲來參加遊行(集會)的人，一定愛注滿三筒預防射，這嘛是職安的一種。」

今年五一行動聯盟的訴求，包括抗通膨、愛加薪、愛職安、保年金。聯盟表示，受疫情影響，物價大起，薪資的成長逐袂赴物價直直起。要求各企業愛加薪，嘛要求中央落實制定最低工資法的承諾，

全國產業總工會理事長 江健興表示：「(舊年) 勞工的平均月薪，實質月薪是43211箍，(今年) 包括通膨影響實質薪資，顛倒退到41422箍，咱勞工的實質薪資已經倒退攄，職業災害保護法已經正式實施，佇災前政府應該愛做一寡仔措施，災後欲按怎予勞工會使重建。」

聯盟嘛呼籲中央以稅收等等方式，避免勞保破產，強調勞保年金改革愛參勞工團體溝通，確保勞工退休後的權益。