2/21世界母語日 國家語言文化生活節今開辦

2/21是聯合國的世界母語日,文化部特別對今仔日開始、連辦三工的國家語言文化生活節,邀請母語團體佇現場排擔仔文化交流。總統蔡英文踅擔仔位也特別用母語佮囡仔互動。伊強調對111學年度,國中小的本土語言列做必修,是政府立法欲保存語言的決心;伊也希望社區、政府機關,會當打造友善的母語的環境,予母語生活化、文化繼續流傳。

總統蔡英文 vs 台語母語團囡仔:「你有上幼兒園無?(有)幼兒園有講台語?(無,講華語)。」

五歲外的囡仔和總統用母語開講,總統毋但欽佩幼囡仔 gau5講台語,也鼓勵伊佇幼稚園加佮朋友講。世界母語日2月21隨欲到矣,文化部對2月18到2月22,專工辦三工國家語言文化節活動,邀請包括臺灣手語、馬祖閩東語、台語、原住民語、客語等等國家語言團體,佇台灣文化基地擺攤,做跨世代、迒語言交流,總統致詞的時,也強調對保存母語的重視和決心。

總統蔡英文:「佇台灣多數語言面臨傳承危機,今年111年學年度開始,包括馬祖閩東語在內的本土語言和臺灣手語 ,攏會列入中小學的必修課程。佇學校以外,咱也閣較愛予母語行入政府、行入家庭、行入社區內底。」

總統也向望社區和政府機關攏成做實踐母語的友善環境,文化部也表示母語流失嚴重,會承擔復振語言的重擔。

文化部長李永得:「過去已經有專責單位的,就繼續由各專責單位繼續推動;猶未有專責單位的部份,文化部成做國家語言的主管機關,阮全部承擔落來。」

文化部表示這回國家語言生活節活動主題叫「咿呀說」,代表紅嬰仔佇咧學講話的過程,希望重新共國家語言發展的過程揣倒轉來,予台灣的多元和美麗對語言保存,永久傳承。

相關新聞

專題|全台敬老金大調查