新北貢寮設網仔箱供魚栽適應 提升放流存活率

新北市漁業處舊年和海洋大學合作,佇貢寮的美艷山漁港設一區網仔箱,成做魚栽放入大海進前,暫蹛的所在。魚栽提早來適應海水,也增加放魚栽的生存率。



魚栽佇海底泅來泅去,邊仔閣有蚵仔、海草等等成做共生環境,貢寮美灩山漁港遮的網仔箱,是頭一个魚栽放流進前,通先適應環境的中繼站。

新北漁業處漁業技術課長 俞怡君:「早前魚栽放流是直接對漁港遮,直接放流,放流去外海,但是一般按呢的魚栽,攏是對中南部運送起來,對養殖場運送起來的魚栽,伊按呢盤來盤去,放流的效果,可能有的魚仔,定定產生傷亡的狀況」。


漁業處表示,這个網仔箱的目的,就是欲提懸經濟魚類的存活率,IN自舊年八月就佮海洋大學合作,以進前暫時飼的石鯛來講,成一個月的魚栽,放流存活率欲百分百。

海洋大學水產養殖學系助理教授 徐德華:「阮這中央育成,除了會使予in做短短的歇睏,阮也會當評估,這一批的存活率好抑是䆀,健康抑是無健康,其實觀察三工、五工、七工,其實看物種,假使密度較懸,我飼三工確定活力袂䆀,其實就通共伊放流出去」。

漁業處表示,這个網仔箱就親像魚仔欲流去大海進前的過渡站,按算今年會做閣較濟魚類的測試,共遮成做示範的基地,為各地的栽培漁業提供經驗。


 

全台敬老金大調查

相關新聞