臺博館"偶的故事偶來說"展 說布袋戲藝術風華

紹介收藏的布袋戲尪仔是按怎囥，也共研究人員按怎透過科學儀器判斷、修護保存布袋戲尪仔的部份展予逐家知。國立台灣博物館因為這幾冬，陸續收著西田社佮台原偶戲館超過萬外件的布袋戲尪仔佮文物，這馬特別辦展覽展出。

臺博館館長洪世佑表示：「阮博物館也希望講，會當將布袋戲尪仔，除了演出以外，會當用這種展覽的方式，來推廣台灣的文化。會當對無仝的角度，得著表演以外，真濟布袋戲尪仔的智識」

西田社是長期關懷布袋戲的民間團體，有布袋戲老師表示，佳哉有in做開路先鋒，收藏古早的布袋戲尪仔，若無佇民國75年以後，遮的文物就漸漸失傳矣。展覽當中也會當發見、較早的尪仔較細身、閣有罕得看著的百年戲台等等，這改也特別展出。

策展人陳婉平指出：「這是六跤戲台，因為伊當時演的是較南管，較文雅的戲風，逐家會使看著有三公窗，中央是有門、有紅色這對門的，這比較較是參後來北管的系統，較濟武戲、耍跳窗等等是有差別的」

展覽入口處的兩个戲台，象徵台灣布袋戲發展的兩个階段。而且為著欲予民眾會當參布袋戲的角色互動，閣特別設體驗區，來測家己可能是佗一位人物，予布袋戲也通迒時代重現兩百冬來的藝術風華。