減油潘.擋豬災 新竹開課教用賰的食材做料理

珍惜食材、毋通討債。新竹縣最近舉行一項體驗課程,教逐家按怎用漲出來的食材,做出好食的料理,希望逐家珍惜食材。

共青菜佮雜糧,添入去無食完的白飯內底,利用工具做出三角飯丸,毋但趣味又閣好食,上重要的是食材嘛袂拍損去。
 

參加課程的家長表示:「厝內底食無了的物件,因為我嘛袂曉處理,所以我才想欲來遮學」


廚子師王俊傑指出:「上基本的就是像青的花菜,逐家攏真愛食,共菜擘開了後,賰落來的稈毋通擲掉,真濟人攏會共擲掉真拍損。直接共稈外口的皮去掉,內底就是成好食的菜心」
 

除了利用加的食材製作料理,課程嘛安排tshuā來參加的囡仔,行入去田園內底,熟似各種植物佮營養價值。
 

新竹縣議員林禹佑也講:「教所有的大人囡仔,按怎共厝內較䆀的食物,抑是逐家較無佮意的部份,提來再利用,會使來減少潘水的量,嘛會使來降低非洲豬瘟的風險」


主辦單位環保局表示,逐家欲共閣會使食的物件擲掉進前,可能著愛先想講,世界上閣有真濟人當咧枵腹肚,而且地球資源有限,需要逐家做伙珍惜。

相關新聞

專題|全台敬老金大調查