遺傳疾病影響視力 吳承澐靠音樂奏出自信

清華大學的學生吳承澐，14歲的時陣因為罕見疾病，目力只賰0.01，干焦看會著微微仔的光。面對這个打擊，伊意志消沉，後來是透過音樂活出自信、揣著人生方向。

寫字的時陣需要倚遮近，才會使共字看清楚，吳承澐14歲的時陣，因為遺傳疾病，視力強欲降到零，猶毋過伊並無因為按呢就予命運拍敗，顛倒是調整學習佮生活的方式，靠音樂創作揣著人生方向。

舊年五月開始，伊去到車站連車牌仔佮座位攏看袂著矣，猶原是一个人坐高鐵閣再換公車，去真濟學校巡迴演講。雖然行動毋是蓋方便，毋過知影有人受著鼓勵，伊愈堅心欲繼續四界去分享。

吳承澐鋼琴嘛彈甲真高明，雖然伊眼前的世界，總是雺霧看袂清，猶毋過伊講已經揣著新的人生方向，希望通用音樂幫助閣較濟人。