屏東縣定古蹟"朝林宮" 等111冬才有門牌

屏東縣潮州鎮泗林里有一間超過100年歷史的縣定古蹟──朝林宮，因為起廟的時猶無建築法，無通請建築使用執照，就按呢無法度請門牌，毋但有產權疑慮，也無法度辦建築物保存登記。這陣朝天宮依照文資保護法，縣定古蹟無受建築法約束這條法條，才通敆這塊等了111年的門牌。

潮州鎮泗林里的朝林宮主神拜天上聖母，當當時起廟的時是佇日治時期，彼當陣猶無建築法，無通請建築使用執照，宮方也無法向戶政單位請門牌，毋那有產權疑慮、也袂使辦理建築物保存登記和清理廟埕的申報作業。這陣佇潮州鎮公所的協助之下，朝林宮用文資保存法內，縣定古蹟無受建築法約束的這項法條，才順利請著門牌。

百年古蹟等了百年才等著這塊門牌，宮方講這是一个新的開始，也望未來推動宮內事務也會使閣較順利。