臺灣台語全國政策論壇 頭一場臺南成大起鼓

國立成功大學台語文學系系主任，陳麗君表示：「1700字敢讀有文章？讀無。這是咱推捒20冬台語教育的結果。」

教育部認定，認捌3700字，是脫離青盲牛的標準，毋過成大台文系主任陳麗君講，咱台語教育捒20冬，國中三年仔的囝仔煞捌無一半的量，學校的台語教育出問題。為著欲收集逐家對台語推捒政策的看法，臺灣台語全國政策論壇欲佇北中南東相绁舉辦四場，13由南部論壇拍頭陣，佇咧第一線的台語老師講，台語教育政策愛一貫化。

台語教師，吳老師表示：「對國小的時陣咱愛先開始學音標，二年仔抑是三年仔的時陣，𪜶的台語詞彙愛認捌幾个字體，這應該是愛有一个具體的政策，按呢才有法度共咱這个台語的能力沓沓仔培養起來。」

台語教師，蔡老師表示：「干焦阮這代的可能講猶閣會使，猶毋過這馬的囡仔，其實足欠學校抑是整個的環境來共幫助。」

無論是講台語的環境、制度，台頂台跤攏互相分享交流，陳麗君也舉英國愛爾蘭保存母語的例講，包括法律地位的保障、教育體系的改革，語言地位的重新建構，尤其是愛建立制度、投入資源，按呢台語復振才有希望。

國立成功大學台語文學系主任，陳麗君表示：「語言文化欲保存，毋是干焦是靠愛臺灣，抑是講感情按呢爾。愛有制度的支持，若無制度整個的支持，閣較愛，咱嘛是坐佇遮流喙瀾。」

前台灣文學館長，鄭邦鎮表示：「咱今仔日若毋是行佇咧這个方向，按呢攏是加了的就著，水若直直漏，你毋去補漏，你干焦水直直添，啊有啥物路用咧？」

陳麗君表示，目前十四歲以下會曉講台語的人，干焦賰七趴，台語教育制度有重耽，咱就來改正，後續閣有三場論壇，逐家的意見攏會收集起來，成做明年國家語言發展會議的推捒方向。

許嘉茹 邱紹揚 / 臺南報導