7/13暗時出現今年上大滿月而且閣大流，真濟沿海地區攏出現海水倒灌。早起臺南安平運河邊，就因為海水倒灌，車路積水，甚至有淹入去人家厝，內面的電器浸水歹去，民眾也無閒咧摒掃。
國內今仔日增加2个本土病例，是高雄宮廟旅遊團湠出去的個案。根據調查，發現這个宮廟旅遊團的感染源是對新北市設計師來的，目前國內猶揣無感染源的傳播鏈猶有3條。也因為國內疫情漸漸穩定，注疫苗的意願就開始降低，指揮中心宣佈對3/10開始，65歲以上猶未注疫苗的民眾，若準去注，會當提著價值500箍的衛教品，高雄市閣會另外分禮券200箍。
臺南龍崎變電所是牽連南部大電廠運作的重要電力設備，初三受著高雄興達電廠的事故影響，致使大停電。行政院長蘇貞昌今仔日就到龍崎變電所視察，也閣強調一定會追求停電的責任，絕對袂私偏。這改失電害真濟產業損失嚴重，攏欲向台電討賠償。毋過干焦算民生方面、台電可能就愛賠超過六億，創上濟紀錄。
