傳藝中心推廣兒童戲曲 起鼓巡演行入校園

改編西遊記的故事，和囡仔有心適的互動，風神寶寶兒童劇團，搬這齣創團大戲「風神寶寶之火焰山」，予囡仔那看戲、嘛那學台語，有的囡仔雖然聽無台語，嘛看甲真有趣味，也有佮意服裝設計愛看戲的。

民眾：「服裝真奅，因為本身有看過（西遊記），所以就真佮意；然後互動嘛真濟。」

布袋戲劇團「雷音劇坊」用臺南南鯤鯓傳說中，青暝龍、青暝溜出來tshit-thô，煞做大水的故事，來提醒囡仔愛有防災意識。另外，唐美雲歌仔戲團，嘛做一齣全新的戲「收妖日記」，欲對主角收妖的過程，予囡仔學會曉共家己專長用來回報予社會。

雷音劇坊團長 陳建霖：「雷音劇坊有三个重點：一个就是台語為主；共臺灣的故事去發想；第三个就是阮會寄望講，用歌仔調（來演）。」

唐美雲歌仔戲團長 唐美雲：「佇咧成長的過程，咱愛會曉去選擇，莫驚壓力，而且愛會曉面對所有的挑戰；上重點是佇咧講，囡仔會當歡喜做家己的代誌，但是有當時仔囡仔會較毋捌代誌，需要聽眾序大人伊來共咱教育。」

為著欲予傳統戲曲文化釘根，培養囡仔觀眾和看戲的興趣，傳統藝術中心辦「兒童戲曲巡演」，今年拍算欲佇173間國校仔表演。另外，中心嘛和臺灣歌仔戲推廣基金會合作推動「兒童歌仔戲」拍算欲去到7个縣市巡演。

國立傳統藝術中心主任 陳悅宜：「除了囡仔聽有看捌了後，阮嘛希望怹透過這个戲，會當了解家己的故鄉、了解家己的傳說、愛家己的文化。」

臺灣歌仔戲推廣基金會董事長 林茂賢：「歌仔戲上蓋重要的不只是培養演員，閣較重要的是培養基本觀眾，因為你若無觀眾歌仔戲就袂存在。」

傳藝中心希望透過行入校園、踏出戶外，這兩項策略欲邀請囡仔來看戲，希望鼓勵劇團、劇本創作者，未來會當搬愈濟戲做予囡仔看，激出戲曲的新能量、花開滿山坪。

記者 呂尚儒 莊浚佑 臺北報導