教育部按算編寫教材 判斷中國威脅、國際情勢

舊年10月的歐洲議會，捌譴責中國不當解說、利用聯合國第2758號決議文，來排斥臺灣參與國際。延續這个議題，這陣有專家學者建議咱國的教科書愛寫予清楚，國家教育研究院咧4/16有招專家、學者、佮出版業開會，建議咧國中、高中的課本內底，這寡歷史上重要的國際決議、和約等等，應當愛呈現英語原文和中文，幫助學生了解歷史的原貌。

國家教育研究院副院長 顏慶祥：「中國一直引用聯合國2758號決議文，講中華人民共和國有中華民國咧聯合國的代表權，但是咧文件中並無講著中華民國抑是臺灣。若是囡仔通看著真實的歷史文件，按呢咧老師佮學生去進行多元的思辨和探討，我認為這个過程是會當恢復原貌。」

毋但2758號決議文，猶閣有開羅宣言，國教院嘛建議課本愛加補充後續的舊金山和約、中日和約等，完整說明戰後日本放棄對台灣的一切權利。有歷史學者表示肯定，認為課本應當佇歷史真相的基礎頂懸，予學生對歷史有清楚閣完整的脈絡，按呢對臺灣的歷史佮咱的國際處境，才會有愈濟思考佮討論。

政大台史所教授 薛化元：「徛咧教育的立場，就是愛尊重歷史的事實。所以逐家會當解說無仝款，但你總是愛針對重要的歷史史料的內容，愛介紹予學生知影。我相信歷史的事實，就是徛咧臺灣的主體性這爿。」

國教院表示這个會議的內容雖然是建議性質，毋過會議中三方攏有高度的共識，這改開會來討論教科書的編輯原則，嘛是向望予學生通學會曉對歷史佮資訊的閱讀佮判斷思考，通綴會著社會脈動，嘛希望未來通減少外界對歷史的誤解。

記者 呂尚儒 莊浚佑 臺北報導