臺南人權月展覽 用多元藝術創作講白色恐怖

藝術家用磚仔壁去模擬往過臺南市警察署的模樣，1950年濟濟政治犯攏予人掠來遮審問，這馬遮已經成做臺南美術館一館。為著予逐家對白色恐怖佮威權統治閣較認捌，臺南市文化局頭改以「臺南人權月」辦展覽，毋但有電影劇組重現不義遺址的場景，嘛有受難者出面見證，1970年台南發生爆炸案，陳欽生雄雄予人掠走去坐監。伊向望民主莫行翻頭路，予威權體制留佇歷史當中。

白恐受難者陳欽生，「我佇四種刑求當中，我想欲自殺，其實有一陣人犧牲伊的性命，犧牲伊的青春所換來的，所以咱愛珍惜，這个得來不易的民主佮自由。」

策展人沈菲比，「逐家可能聽著白色恐怖，會感覺這參咱距離抑是，時空非常遠的代誌，毋閣事實上白色恐怖時期發生的故事，可能就佇你的家鄉、就佇你的身邊。」

另外佇愛國婦人會館，其中有女性政治犯施水環，伊出業頭一份頭路就佇遮做。家齊高中師生參藝術家以施水環姐弟仔做主題，呈現伊的服裝，兼打造當時施水環共伊小弟藏佇天篷的情景。展覽中紹介無仝族群、階層民眾抵抗的行動，予民眾對過去歷史反省參思考。

臺南家齊高中學生，「伊小弟彼當陣就佇臺大讀大學，敢若伊小弟的朋友出代誌了後，伊就共伊小弟藏佇ﰀ兜，結果伊就予人掠走矣。」

臺南家齊高中校長陳韻如，「囡仔除了是ﰀ了解臺南的歷史以外，ﰀ嘛了解家齊高中，這一百年來的歷史。」

臺南人權月展覽有四大展區，計總展出28組創作，主辦單位講，紲落來閣有人權音樂會參講座等無仝型態的活動，來體會人權的珍貴。