新竹美學館推動科技藝術 掛VR目鏡虛擬創作

頭掛VR目鏡透過手中的控制器，佇空中劃來劃去，免十分鐘的時間，一張色彩豐富的數位創作就完成矣，藝術家講佮一般的實體創作相比，透過科技會當予創意閣較無限制性、通完全發揮。

藝術家林佳潔，「我就是愛掛VR目鏡，佇虛擬的空間畫出3D立體的線條，我感覺佮實體比上無仝的所在，就是會當有真濟想像的可能，然後會使用家己想像中任何世界，甚至是較無合理的內容，攏會當輕鬆表現出來。」

另外一項是利用VR技術，予民眾只要掛目鏡，就會當來到虛擬博物館、參觀藝術創作，而且閣會使親像手機仔仝款，共作品放大來欣賞。

台藝大新竹校友會理事長蔡世明，「若是會當佇厝內，就會使直接欣賞著藝術家的作品，是一件真快活的代誌，所以用這套系統就會當掛VR目鏡，直接來到虛擬藝術館，會有一个真讚的藝術體驗。」

臺灣藝術大學以「竹塹建城三百年」做主題，佇新竹美學館展出濟項作品，除了有新竹漁港水彩創作、新竹玻璃創作以外，嘛因為新竹有科學園區關係，所以特別結合科技，予展覽充滿在地特色。