七娘媽生「做16歲」 新竹竹蓮寺照古辦成年禮
發布時間：
更新時間：
舊曆七月初七是七娘媽生。七娘媽是囡仔的守護神，信眾佇這工攏會攢雞酒、油飯來拜七娘媽。佇新竹的竹蓮寺、今仔日嘛照古禮、替囡仔做16歲，舉辦成年禮，共「脫絭」，代表正式「轉大人」。（此則新聞標題、導言、內文皆為臺語文。）
遵照古禮，佇七夕這工、請出七娘媽，替今年滿16歲的學生囡仔，舉辦成年禮。也就是民間咧講的「做十六歲」。
軁過七娘媽的轎跤了後，共囡仔掛佇頷頸仔、保平安的絭提落來，一般號做脫絭儀式，予囡仔了解對今仔日開始，家己已經轉大人。
參與學生表示，「感覺迒過囡仔的時代，就變成大人矣」
參與學生：「參加活動，代表家己大漢矣然後嘛愛對家己負責任。」
竹蓮寺主委許修睿表示，「今仔日的儀式就是來感謝七娘媽，自細漢到大漢，照顧囡仔平安大漢，然後予所有的囡仔知影，家己已經成年，愛對社會、對家庭、負起家己的責任。」
民間風俗、七夕拜七娘媽，因為神明是女性，所以佇牲禮上會特別準備攢胭脂水粉，另外嘛有麻油雞、油飯等等，專家講愛注意的是千萬毋通囥箸。
文史工作者黃有福說明，「大部份攏會攢油飯來拜，然後毋免囥箸，因為民間認為 驚七娘媽管教囡仔，提箸拍囡仔，所以莫囥箸，除了油飯閣愛囥化妝品，古早時代 胭脂就是上好的化妝品，所以古早攏用胭脂，現在的化妝品就較濟項矣」
今年竹蓮寺「做16歲」的儀式總共有八百个學生來參加，主辦單位希望透過成年禮的儀式，予學生體會「轉大人」愛有大人的責任，另外閣較重要的是，予囡仔未來有滿滿的祝福。
洪家馨/編輯
