新北大觀幼稚園 積極打造母語環境講臺語
鄭雅文 莊沛文/新北採訪報導
發布時間：
更新時間：
目次
教育部最近幾冬除了佇高中以下推動本土語言的課程，嘛有幼兒園用浸水式教學教囡仔講台語，親像新北市的大觀非營利幼稚園，就打造母語環境。
老師參囡仔用台語講話、互動，這是板橋大觀非營利幼稚園的日常。
大觀非營利幼稚園表示，因為看著真濟囡仔是阿公阿媽接送，但囡仔煞無啥會用台語溝通，所以自4冬前就開始推動台語教育，用浸水式的方式由主題活動、繪本、甚至教室也有貼一寡仔台文字、予囡仔佇生活中捷聽捷講，自然接觸母語。
老師 吳宜靜表示：「阮就以生活經驗為主，就平常時囡仔攏會講著的做結合。」
園長 林芷涵表示：「阮學校其實也有英語融入，因為其實這馬就是一个多語化，我們就會聽著囡仔佇生活中，講弓蕉就是BANANA，所以其實阮會去發現講，家己會去分辨 內化矣。」
園長表示，老師會透過台語研習課佮互相討論來發想主題，真濟家長也真支持囡仔加學一寡仔語言。新北市教育局表示，配合教育部推動多語化，最近幾冬參加台語浸水式計畫的學校也愈來愈濟，今年新北市內有28間，雖然佇都會區推展母語無蓋容易，也希望透過向下釘根繼續傳承。
2022杭州亞運 台灣百金之路
