影片紀錄傳統戲曲發展 向望珍貴藝術代代湠

斟酌弄掌中的尪仔，布袋戲大師陳錫煌今年已經91歲矣，猶原咧為傳承傳統藝術拍拚，伊嘛向逐家講出伊的煩惱。

布袋戲藝師 陳錫煌講：「毋是親像較早，咱較早若搬戲，著無，棚跤攏有人，你這馬若去搬一棚戲，棚跤攏無人」

仝款面對傳承危機的歌仔戲，現此時嘛做一寡仔創新，希望吸引閣較濟少年人來看，甚至加入劇團。

歌仔戲劇團團長 孫榮輝講：「這馬就比較，就較美感，予遐的少年講，做歌仔戲，小生小旦攏遮爾媠，我嘛想欲參加」

無論布袋戲抑是歌仔戲，佇傳承的道路頂懸，攏會面對語言失傳的問題。

歌仔戲資深演員 王金櫻講：「字袂正、腔袂圓，親像一班有遮爾濟的，我佇咧遠遠按呢咧教學生，我看伊的喙我就講，來、來、你來，你唱毋著，伊講老師你哪有聽著我咧唱，我講我看你的喙形就知影你唱毋著」

布袋戲操偶藝師 陳錫煌講：「你閣較gâu搬，伊台語就袂曉聽，著無，創彼字幕，字幕創落去，伊這寡仔藝攏免，免看藝矣啦，伊干焦看字幕就好矣」

台北市文化局廿五發表今年出的三支紀錄片，分別紹介布袋戲、歌仔戲、京劇的發展佮傳承，向望遮的藝術佇台灣會當一代一代傳（thn̂g）落去。