放補習班違法經營 監委糾正教育部.北市教育局

有短期補習班違法經營幼稚園、安親班等等,品質佮安全攏會出問題,監察院認為,這是因為相關規範無周全,地方政府嘛無好好仔稽查。今仔日監察院召開記者會,對教育部佮臺北市教育局提出糾正。

應該愛停辦的補習班無停辦,應該愛改進的所在猶原無改,顛倒繼續佇各地頭設點。

監察委員 蔡崇義指出:「105年臺北市教育局講,咱愛共伊依法裁罰6到30萬,並且命令伊立即停辦,各位看著這是105年;六年以後,111年咱去看,這馬這是全國性連鎖機構」

監察委員蔡崇義、王幼玲佮張菊芳十六召開記者會表示,全國合法的課後照顧中心干焦787間,國小短期補習班煞有超過一萬間,意思就是,大部份家長送囡仔去的安親班,攏是法律上無法度經營安親班的補習班。

監察委員 王幼玲指出:「毋管是場地的面積、老師的資格、師生的配比,咱都會使看著,短期補習班是上冗的,所以逐家攏用短期補習班,所以我才講短期補習班,變成安親班佮幼兒園,佮實驗機構的變形金剛」

三个監察委員認為,因為中央對短期補習班的規範不足,予業者會使軁空縫,地方政府稽查閣無周全,放予遮的高風險的業者繼續營業。

監察委員 張菊芳表示:「咱攏希望教育部愛督導地方政府,去檢討改善,真正會當落實稽查,才有法度查出彼个違法經營,若無就會一直坐大」

監察院對教育部佮臺北市教育局提出糾正。對此,臺北市教育局表示,因為仝一个業者會將補習班、安親班等等分開登記立案,所以造成in稽查的困難,毋過未來in會嚴格稽查。

九合一選戰解析

相關新聞