清大團隊研究 課本注音傷細字致濟學生近視

清華大學的團隊研究發現,臺灣國小囡仔近視比例較懸的原因,真有可能是佮課本的注音符號傷細字有關係,咱做伙來了解。

掀開國小2年仔的課本,想欲看清楚內底的注音符號,確實無遮爾簡單,清華大學教授周卓煇的研究團隊指出,對小學生來講,注音是學習新字上重要的符號,為著欲看斟酌,會更加倚近距離去看冊,這真有可能就是真濟囡仔近視的主要原因之一。

清大材料科學工程系教授 周卓煇指出:「國字的字誠大、注音符號誠細,對大人來講國字逐家攏會曉,囡仔無認捌國字,就需要去看注音符號。注音符號大細是國字的1/8,國小一、二年的囡仔,就需要靠誠細字的注音符號來學習,注定咱會近視,而且近視是全世界第一」

眼科醫生表示,依照目前多元教學的時代,學生讀冊的時間比過去加真濟,若是課本傷過細字,對囡仔的目睭確實真食力。

臺大病院眼科醫師 葉伯廷表示:「以學齡囡仔來講,閱讀是需要的。較注重升學的學校,考試寫作閣有閱讀,攏是教學重點課程,若是字傷過細,近視是一定會閣較深」

今年過年假期長,閣再加上疫情的關係,真濟人佇厝內使用3C產品的時間嘛增加,造成目睭無爽快,醫生特別提醒民眾愛有適當的歇睏,才袂去影響目睭的健康。

全台敬老金大調查

相關新聞