VR結合生態旅遊節目 牽民眾熟識原住民文化
洪敏真 莊沛文/臺北報導
發布時間：
更新時間：
捌入圍濟項金馬獎的資深影視工作者潘志遠導演，為著傳承原住民文化，特別以VR影片記錄部落，克服環境氣候因素，透過720度的〈虛擬實境〉，結合生態旅遊節目，望帶動地方產業，也予民眾有無仝款認捌文化的方式。
頭頂掛VR顯示器，手攑控制器，黜藤球，佇720度的鏡面內底，體會排灣族傳統儀式五年祭成做勇士的必經過程，對台東土坂部落出產紅藜、出名的情人橋、規个大街小巷，攏通親身行一逝，感受土地的媠，按怎予使用者感覺真實，是上大的挑戰。
VR金鐘導演潘志遠講，「對頭前錄影到後壁完成，差不多六個月的時間。氣候閣有環境，對阮來講彼攏是一寡考驗，所以講愛來回去做，才有法度呈現出一个完整的部落面貌。」
政治大學傳播學院廣告學系特聘教授林日璇表示，「所以這種可能佇技術上，可能會致使閱聽眾感覺這毋是我的問題，是愛透過足濟設計的方式去解決，因為伊是360度的影片，所以你按呢拖影片的任何一个所在，你就會當去探索。」
這个新生態節目是政治大學和電視企業集團合作，用虛擬實境打造，三月初整個虛擬影片就會佇網路播送，觀眾就會當用各種裝置體會，若有家己的顯示器，效果會閣較好。
原住民族委員會經濟發展處副處長蔡妙凌表示，「希望透過咱一寡資源的注入，予逐家發覺原住民閣較濟美好的，不管是你心靈上的感受，或者是視覺上的感覺。」
政治大學校長郭明政講，「永續發展的一部份，這是全世界攏愛去做的工課，城鄉分離愛共伊合倒轉來。」
業界和學界攏期待透過元宇宙虛擬概念，予閣較濟人來一改原住民深度部落旅遊，顛覆往過影音內容製作技術限制，也帶動地方文創設計和地方創生的能量。
專題｜改造地獄路 台灣行人路為何難行？
