咱國釋迦中國銷路斷 北農推網路注文拚內銷
郭柏均 謝季潾 / 臺北報導
發布時間：
更新時間：
台灣往過一年有一萬四千噸的王梨釋迦銷去中國，毋過今年9月，中國宣佈暫停進口台灣的王梨釋迦。為著欲幫助農民，北農這馬推出線頂買賣的服務，免到現場就會當落訂單，希望增加釋迦的銷路。
一粒一粒飽仁的王梨釋迦，毋但大粒，果肉嘛真實腹。11月到明年3月王梨釋迦大出。今年九月，中國宣布暫停進口台灣的釋迦，為著補欠口，中央地方提出各種方法，親像北農就推出預約交易，線頂作業免到拍賣現場。
農委會主委 陳吉仲：「所以咱五千公噸的外銷絕對無問題，六大加工業者，每一間承諾五百到六百公噸，總數超過三千公噸的加工，更加重要是，愛來做五千公噸以上的國內行銷」。
臺北農產運銷公司總經理 翁震炘：「直接產地到承銷人，阮的交易手續費就是買賣各1.5%，會退1%，量少的就到批發市場來，仝款會予伊獎勵」。
北農表示，11月開始，就透過超市、線頂等等通路加強銷售，數量達到256公噸，是舊年仝期的7倍。針對前一陣仔傳出產地價數大落的問題，北農強調，價數佮舊年比並、並無啥物差別。
臺北農產運銷公司總經理 翁震炘：「王梨釋迦的價數阮攏咧注意，特別因為這是批發市場，也是逐家全國的價數指標，最近攏佇六十幾箍，佮舊年仝期差不多，阮會予農民佇產地得著合理的價數，管銷費用盡量壓低」。
陳吉仲表示，預約交易機制，會使予以後佇拍賣的時，免遐大的空間。搭配儀器檢驗、標準化的包裝處理、冷鍊流程等等，會使提升農產品的價值。
2022杭州亞運 台灣百金之路
