芎林罕見磚仔窯有四角形的煙筒 地方望整修保存
加入公視會員，
按讚收藏你關注的報導
發布時間：
更新時間：
新竹縣芎林鄉的上山村，過去因為在地有紅磚仔產業發展，予人叫做「打磚窩」。舊年，在地社區的規畫師閣佇規片的竹仔林內底，發見一座拋荒誠久的紅磚仔窯，而且是這座磚仔窯的煙筒，是四角形的，咱做伙來看。
這座懸度17米的四角形煙筒，藏佇規片的竹仔林內，是舊年社區規畫師佇翕紀綠片的時陣，無意中發現的。經過調查，有57冬的歷史。
經過了解，原本磚窯的業主姓徐，佇1964年tshuā規家伙仔，剉竹仔搭鷹架，對下跤開始將磚仔角一塊一塊疊起去，誠無簡單才完成這座四角形的煙筒。
因為時代久長，四角形的煙筒有一寡所在出現必縫，協會嘛已經提出計畫，紲落來會修整煙筒佮邊仔的工作平台，按算7月著會使完工，予這座新竹縣內唯一的四角形煙筒重生。
這座懸度17米的四角形煙筒，藏佇規片的竹仔林內，是舊年社區規畫師佇翕紀綠片的時陣，無意中發現的。經過調查，有57冬的歷史。
紀錄片作者林賜霞：「當初發現的時陣，真正是毋敢相信，芎林竟然有這款的寶物藏佇內底。」
芎林文史工作者張民依：「較早的厝簷是用茅草，後來有紅瓦了後，慢慢改變庄仔內厝宅的外形，所以有起厝的需求，就會有紅瓦的需求。」
磚窯業者第二代徐素媖：「囡仔時會提兩塊磚仔，閣有一片瓦共架起來，然後去揣真濟焦草，囥踮瓦下跤來起火。」
磚窯業主第二代徐鏡銘：「阮嘛無想著會使徛遮爾久，較早下跤是誠大，一尺二的壁，到頂懸就換八寸。」
磚窯業主第二代徐素春：「日暝燒，攏袂使停火，才會變做紅紅一塊一塊。」
芎林亮起來發展協會理事長徐烈均：「有遮爾寶貴的物件，咱愛好好共保存，真濟人生甲遮大漢，五六十歲攏閣毋知影，這个所在有打磚厝。」
