屏東萬歲團街舞展演 老大人.學生同齊展風神

屏東有一團加起來1萬外歲的舞團,舉辦街舞展演,這團的成員有90歲的阿公,也有猶咧讀冊的學生,毋過扭起來,阿公阿媽是完全袂輸予少年囡仔,咱做伙來看這陣長輩佇舞台頂展風神。

舞台頂的燈光閃閃爍爍,舞者穿的表演服裝紅媠黑大範,毋但舞台佮衫褲氣勢十足,īn跳的街舞舞步嘛足扭掠,你敢相信這是一陣平均年歲超過74歲的阿公阿媽佮青少年學生,做伙組成的舞團。

屏東舉辦這款予老大人跟少年人互動的活動,已經第五冬,今年選擇用街舞展演的方式,予少年囡仔佮長輩做伙學舞3个月,仝齊設計表演內容,證明兩个無仝的世代,也會當配合甲峇峇峇。

這个舞團的成員,真正無簡單,全部的成員加起來萬外外歲,而且有的長輩已經攑拐仔、有的是捌中風過,甚至閣有90歲的阿公,人老心無老,雖然īn跤手無遐猛掠,煞也堅心共規條舞學甲了。

「食一歲 學一歲」,這陣阿公阿媽的活力佮堅持,證明跳街舞毋干焦是少年人的專利,透過這个表演,予老大人逐工的生活佮較有寄望、佮較有自信,嘛予孫仔輩透過日常的相處,學會曉按怎佮長輩鬥陣。

九合一選戰解析