學校敢通禁手機仔？ 醫：若用過磅、影響腦發展

桌頂的手機仔看最後一眼，學生就愛排隊囥入箱仔鎖起來，等到放學才通閣提轉去。像臺南德光中學，若欲紮來學校，就閣家長填寫申請單，校方兼會加強巡堂管理。這陣科技發達，普遍逐家攏有手機仔，毋過若無適當使用，恐驚會影響上課無法注心。

有家長表示：「高中這陣，有時陣嘛是需要參同學有一寡議量，嘛是會予伊紮去學校，毋過會予伊學習啥物時間做啥物代誌。」

臺南市德光中學學務教安人員—邱錦昌講：「原則上是以手機仔的櫃仔，各班的老師會準備一个手機仔的保管箱來做管理。」

目前學校對手機的管理方式攏無仝，有的是規定愛收起來，有的是開放交予學生自主管理。臺南女中觀察，若學生手機仔用過頭，確實會影響學習成效，甚至出現「學習M型化」現象，校方認為，這攏需要靠學生本身的自律來維持。

國立臺南女子高級中學校長—洪慶在表示：「充分使用手機仔、使用網路查詢資訊來幫助伊學習，按呢真好，但是若家己無法度控制學習相關的，確實會影響伊的學習，確實會產生M型化。」

有醫生認為，耍牢手機的情形，參青少年佇現實生活中，無得著成就感，去網路世界揣滿足感有關係，致使囡仔就會提早轉大人、接觸歹習慣，甚至佇現實中較無法度佮人接觸，連帶影響腦神經的發展。奇美醫院精神醫學部部長—林健禾就講：「青少年是咱腦神經第二斗發展的時陣，咱一般講的轉大人這个時間，你若轉了好、神經發展了好，你將來就靠遮的智慧去應付你一世人的行為；你若佇這个時間共訓練耍手機仔，真可惜，正常咱這个時間參人做伙互動，耍手機仔就變成一寡傷害。」

針對校園內使用電子產品的問題，教育部5/14表示「校園行動載具使用原則」新版規範近期就會公告，按算9月新學期正式實施。未來會以「學生入校，手機仔集中管理」為原則，若詳細執行方式，會尊重各校自訂。

記者 李晨宇 臺南採訪報導