紀念臺灣茶業之父李春生 演員搬台語舞台劇
發布時間：
更新時間：
1869年，有一个大稻埕的生理人──李春生，彼个時陣，伊共臺灣的烏龍茶銷去全世界，予大稻埕衝起來，甚至帶動規个臺北城的發展。今年是李春生過身100年，有劇團欲用臺語來搬演李春生的故事，望予逐家知影咱的臺灣茶佮在地故事。（新聞標題、導言及內文皆為臺語文）
演員：
「石頭飛向春生的頭殼額仔！」
「棍仔差一點仔將怹兩个絆倒！」
「袂用得倒落，倒落去就穩死的！」
因為太平天國之亂，生理人李春生對廈門來臺灣艋舺，煞無受當地人歡迎，就搬到大稻埕，同時伊看見台灣北部山區有種茶的潛力，伊對廈門進茶栽，教臺灣農民種茶、做茶，落尾伊共這寡茶米號做「Formosa Oolong Tea」銷到全世界，大稻埕的繁華時代自按呢開展。
《茗王－臺灣茶業之父李春生》導演 宋厚寬：「你看這馬臺灣大街小巷，全部攏有手摵茶；臺灣的茶米，所有長輩攏啉老人茶。其實這件代誌毋是理所當然的。
《茗王－臺灣茶業之父李春生》製作人 周佩蓉：「無李春生，就無大稻埕；無大稻埕，就無臺北城。所以伊是相連紲的事件串聯，變成咱今仔日生活的臺北城。」
這齣舞台劇搬的，是臺灣茶業之父李春生的故事，用全台語來搬演。演員來無仝領域，親像歌仔戲演員王婕菱講，雖然歌仔戲也是用台語搬戲的，但是欲搬舞台劇，對伊來講是新的挑戰。
《茗王－臺灣茶業之父李春生》演員 王婕菱：「因為歌仔戲攏愛唱歌，唱歌的時陣，時間會搝較長；而且彼个歌仔戲的曲調有過奏，會當想，想詞、想動作。歌仔戲的台語是較古代時陣，就是較文白，親像『此時』、『現在』；毋過舞台劇的台語愛較倚現代，所以就較白話。」
李春生是推動臺灣茶葉、佮促進北臺灣發展的重要人物，今年拄好是李春生過身100週年，劇團11月中就會正式推出《臺灣茶業之父李春生》這齣台語舞台劇，欲用在地的語言，講參咱誠搭峇的臺灣茶的歷史故事。
記者 郭柏均 林郁凱 臺北報導
唐嘉良/編輯
