藝術家行路環島畫媽祖 14冬來畫200外幅圖

苗栗的白沙屯媽祖、雲林斗六的斑鳩媽，一幅一幅台灣各地頭的媽祖，是畫家朱朱－黃朱平的作品，伊2010年開始行路環島，因為發覺著每一間媽祖廟的故事、神尊、雕刻手路攏無仝，所以開始畫圖紀錄。

媽祖手繪藝術家朱朱，「行出去以後佮逐家接觸，逐家佮我分享講，這是阮遮的媽祖，我感覺我家己對遮的圖像有一寡認同，毋但講是畫一个圖爾，逐家看著這个媽祖的像，會感覺講對伊有感情，我感覺這和地方連結是真重要的代誌。」

黃朱平十外年前開始畫媽祖，到今已經累積兩百幅的作品，這陣當佇彰化辦展覽，參觀的民眾表示，透過這樣的創作方式認捌媽祖，是真特別的體驗。

民眾，「會使因為按呢去接近咱的信仰，若毋是信仰嘛是一種藝術，我感覺這足重要的。」

民眾，「較活潑、較親切，所以會感覺媽祖是生活佇咱生活當中，毋是一个足冰冷的神尊。」

民眾，「會使共媽祖婆畫遮媠、遮有創意，我看了嘛是感覺足歡喜的。」

畫家黃朱平表示，台灣是一個海島，所以媽祖信仰佮人民、土地有誠深的連結，嘛是咱生活文化的一部份，她希望透過創作，予大眾看著無仝的媽祖法像，予信仰毋但是信仰，嘛是一種藝術體驗。