火金蛄生湠狀況好 後禮拜是欣賞的上好時機

烏暗中一爍一爍看起來有夠媠，四~五月是火金蛄的季節，新竹縣內灣天然的環境，逐年的攏吸引袂少遊客來遮看火金蛄，今年因為天氣關係加上水份有夠，真適合火金蛄湠種，在地的發展協會觀察，火金蛄的數量會比過去加2成。

內灣形象商圈發展協會黃仕鈞，「今年3 4月的時陣、其實天氣算較寒，所以今年火金蛄會較慢出現，毋過水氣濟 嘛會增加火金蛄的數量，所以今年4月底會有大量的火金蛄。」

專家指出火金蛄雖然上佮意溼溼的天氣，毋過嘛真驚落大雨，因為雨水傷濟會影響著火金蛄翼股成長，因為對後禮拜開始，是看火金蛄上好的時間點，專家提醒逐家，無建議紮傷過光、傷過強的手電，才袂去干擾著火金蛄的生態。

新竹縣導覽協會理事長張為庭，「會當準備手電，毋過呼籲上好是攏莫開，手電照跤咧行，頭前的路面就好，較早有一个錯誤的觀念，講手電只要包一層透明的玻璃紙，塑膠做的玻璃紙，叫是火金蛄就袂去驚著，後來發現其實毋著，所有的光源，攏是光害。」

內灣當地的發展協會表示，今年的內灣火金蛄活動，除了會提供現場導覽以外，商圈嘛配合舉辦各種的活動，希望遊客來欣賞火金蛄的時，嘛會當替內灣老街、在地商圈、帶來經濟效益。