長輩喙齒無好、歹哺物 北榮開發「軟年菜」過好年

祖孫仔歡歡喜喜坐鬥陣食好料，規桌有魚有肉嘛有菜佮，攏是豐沛閣腥臊的料理，這是臺北榮總營養部特別為老大人開發的年菜，予無喙齒的老大人，無論菜抑是肉攏會當輕鬆仔哺，閣食會著食材的好滋味。醫生指出濟濟老人因為無啥喙齒，物件歹哺、胃口愈來愈歹，造成營養無夠，甚至筋肉會減少。

臺北榮民總醫院營養師舒宜芳，「阮猶是用均衡的食食來做設計的主題，所以阮著愛包括逐日的六大類食食，阮攏愛共伊設計佇所有的食材裡，干焦是共伊做甲較軟，但是閣無愛糊糊爛爛的。」

病院醫生表示濟濟老大人定定因為肉和菜較歹哺就無愛食，干焦食飯、麵這寡攏是澱粉的食物，像卵白質、纖維就食較無夠。病院就和濟濟總舖師做伙開發11項菜色，營養師強調遮的料理是老大人干焦用用齒岸、喙舌就哺會爛的。嘛提醒民眾厝內咧處理食材的時，上好切甲比1.5公分較細才去煮，才通保留食材口感。

臺北榮民總醫院營養師周秋燕，「所有的菜盡量攏共切，1.5公分以下，欲共煮的時陣過程，有的會使先共燙過，才閣來炒抑是才閣來煮，伊的口味佮口感會變閣較綿閣較好食，一定要共這个卵白質，做予伊用齒岸就會使共ﰐ落去，慢慢仔ﰐ伊肉就會溶落去，伊就會使直接共吞落。」

營養師表示，若欲知影料理敢有煮甲夠爛、夠好哺，會當用西餐的攕仔硩看覓，若小可仔出力就硩會落是上好的。臺北榮總表示in開發的食譜，會公佈佇咧營養部的網頁頂頭，方便民眾參考來煮予厝內人食，予長輩食著開脾閣健康。