新港文教基金會招老師合作 鼓勵囡仔讀冊
林緯廷/嘉義報導
發布時間：
更新時間：
目次
新港文教基金會成立35年來，拍拚推動囡仔愛捷看冊的習慣，甚至閣邀請新港鄉六間國小、五間幼稚園的老師，做伙成立閱讀推動委員會，替在地囡仔規畫冊單，今年閣透過企業的幫贊，揣著2500本冊欲捐予六間國小。
提著冊的囡仔，倚做伙坐佇塗跤看冊，新港文教基金會共各界捐贈的2500本冊，裝佇70个魔法知識庫的冊箱仔，欲予新港鄉所有的國小攏有冊通看。
新港文教基金會董事長陳政鴻表示:「六間國小計共有70班，咱透過這70个冊箱仔，會當送去每一班予囡仔，咱希望囡仔會當用遮的增加的冊，好好仔讀，好好仔利用。」
這2500本冊，是基金會佮新港鄉六間國小、五間幼兒園老師，成立的閱讀推動委員會做伙揀出來欲予在地囡仔讀的冊，有學校就表示，毋但是囡仔愛閱讀，整個社會抑是大人，嘛需要共同參與。
新港國小輔導室主任黃天壽表示:「新港國小內底有誠濟閱讀的資源，會當提供予外來的香客嘛好，予咱的遊客來到新港，會當加入阮推廣閱讀的行列。」
縣政府教育處表示，新港文教基金會35冬來拍拚推動閱讀的風氣，閣透過民間的力量引進數位的圖書資源，希望成做一个閱讀推動的平臺，嘛減少都市佮庄跤的資訊落差。
