支持社子島區段徵收 促進會伨黃珊珊拚開發

臺北市社子島居民權益促進會成員 楊國寶（2022.9.2）表示：「我就是無第二句話，就是支持阮珊珊市長，哪有需要理性佮感性、神經病，就是支持伊，咱的庄頭才會發展，好無！好！」
小小一間房間，人坐甲窒窒滇。支持目前市政府區段徵收開發方案的社子島促進會，九月初二邀請無黨籍臺北市長參選人黃珊珊召開座談會。
臺北市社子島居民權益促進會理事長 楊明照（2022.9.2）表示：「若是講伊將來有機會當選，噗仔聲共伊拍一下好無。」
在場居民遮爾歡喜拍噗仔，是因為佇社子島禁建超過五十年，經過12个市長到現任的柯文哲，總算是等著欲開發的彼工。辭副市場參選的黃珊珊，延續柯文哲的政見，表示為著欲爭取2038年亞運的舉辦資格，社子島開發了後會有水上運動中心。
無黨籍臺北市長參選人 黃珊珊（2022.9.1）表示：「社子島的區段徵收計畫，今年應該會送到中央去核定，有無仝的意見當然愛繼續去溝通，但是整體計畫猶是愛看多數人的利益。」
黃珊珊所講的無仝意見，主要就是來自社子島自救會的居民。
社子島自救會發言人 李華萍表示：「區段徵收伊是將規个社子島攄平，包括咱這馬既有的九大聚落，全部予人攄平，嘛包括咱百年文化，像夜弄土地公，閣有五日節扒龍船遮的活動，伊攏會因為按呢的開發方式，規个予人抹平 予人攄平，所以阮是非常反對這款的開發方式。」
李華萍表示，社子島這馬猶閣保留臺北市難得的田庄文化，厝邊頭尾互相照顧，做伙佇咧田寮煮食開講。九月廿三，民進黨臺北市長參選人陳時中來拜訪自救會，自救會特別請伊來寮仔體會在地的人情味，嘛將陳情批送予伊。
民進黨臺北市長參選人 陳時中（2022.9.23）表示：「這規个政策第一个就愛以人，照顧人為本，尊重個別的意識，第二个環境的保護，第三个才會講到發展，坦白講我看袂著社子島愛全區區段徵收的公共利益。」
針對陳時中這个講法，促進會理事長楊明照認為彼是伊無了解社子島土地的複雜。伊表示，區段徵收毋但會當避免產權佮所有權複雜的問題，嘛會當予五路人攏得著上好的補償。
臺北市社子島居民權益促進會理事長 楊明照表示：「咱照顧有厝的人、照顧有地的人、照顧有厝無地的人、照顧一寡仔遐較弱勢的人，予有安置戶的承購，佮安置戶的承租。」
國民黨臺北市長參選人蔣萬安這幾個月是私底下拜訪社子島幾若擺，嘛有共自救會的陳情批收落來，面對是毋是欲區段徵收的問題，伊猶無直接回應。
國民黨臺北市長參選人 蔣萬安（2022.9.28）表示：「相關的居民安置，相關生態聚落的保留，佮基礎生活環境的改善，未來我會用非常務實的態度，積極佮社子島居民溝通對話。」
社子島開發案的爭議、是毋是欲區段徵收，予居民相觸足久矣。兩爿攏希望一个有智慧的市長，予社子島緊恢復原本的平靜。